Styrktarfélag krabbameinssjúkra barna styður við bakið á krabbameinsveikum börnum, foreldrum þeirra og systkinum meðan á meðferð stendur og áfram, en mörg börn glíma við síðbúnar afleiðingar af krabbameinsmeðferðinni löngu eftir að henni lýkur.

Stuðningurinn felst fyrst og fremst í því að greiða fyrir heilsurækt, bæði andlega og líkamlega, svo sem sálfræðiþjónustu og sjúkraþjálfun. Félagið býður upp á hópastarf fyrir mömmur, pabba og unglinga, auk þess að standa fyrir félagsstarfi, eins og sumarhátíð, leikhúsferðum og jólaballi.

Félagið fær engan beinan opinberan stuðning og fjármagnar starf sitt með framlögum frá félögum, fyrirtækjum og einstaklingum.

Með sameiginlegu átaki getum við því skipt sköpum fyrir börn sem berjast við krabbamein. Upphæðin sem safnast rennur beint til Styrktarfélags krabbameinssjúkra barna.